Metfjöldi árása sjóræningja í ár

Metfjöldi árása sjóræningja á skip varð á fyrri helmingi þessa árs. Alls voru skráðar 266 árásir sem er 36% aukning frá sama tímabili í fyrra.

Þetta kemur fram í skipatímaritinu Lloyd´s List og byggir á tölum frá International Maritime Bureau. Nær tveir þriðju af öllum þessum árásum eiga sér stað undan ströndum Sómalíu en sjóræningjar eru einnig athafnasamir fyrir utan strendur Indónesíu, Malasíu, Singapore og suðurhluta Kína.

Sjóræningjar eru skipaútgerðum dýrkeyptir. Í lok júní voru 20 skip í haldi þeirra og um 420 skipverjar voru í haldi sem gíslar.

Hvað einstök skipafélög varðar má nefna að Mærsk í Danmörku telur að sjóræningjastarfsemi muni kosta félagið um 200 milljónir dollara í ár, eða rúmlega 23 milljarða kr.,  ef þróunin heldur áfram eins og verið hefur. Hér er aðeins verið að tala um tapið vegna sjóræningja í Sómalíu. Kostnaðurinn liggur að stórum hluta í að Mærsk hefur neyðst til að nota lengri skipaleiðir til að komast hjá því að sigla framhjá Sómalíu.