Innlent

Atvinnulausir og námsmenn fá vinnu á gossvæðunum

Jón Hákon Halldórsson skrifar
Sveitarfélögum verður boðið að ráða atvinnuleitendur og námsmenn til þess að sinna ýmsum störfum til aðstoðar fólki á áhrifasvæði eldgossins í Grímsvötnum. Guðbjartur Hannesson velferðarráðherra kynnti tillögu þessa efnis á fundi ríkisstjórnar í morgun.

Efnt var til sambærilegs verkefnis vegna eldgossins í Eyjafjallajökli síðastliðið sumar en nokkuð var liðið á gosið þegar verkefnið hófst, eftir því sem fram kemur í tilkynningu frá velferðarráðuneytinu. Nú er áhersla lögð á að hrinda verkefninu í framkvæmd sem allra fyrst, í samráði við aðgerðastjórn og sveitarfélög á svæðinu, svo aðstoðin komi að sem mestu gagni.

Fulltrúi velferðarráðuneytisins og Vinnumálastofnunar munu fljótlega funda með aðgerðastjórn og sveitarstjórum sveitarfélaga þar sem áhrif gossins eru hvað mest til að meta þörf fyrir aðstoð og ræða framkvæmd verkefnisins.

Laun þeirra sem ráðnir verða til verkefnisins verða samkvæmt kjarasamningum. Verkefnið verður fjármagnað með framlögum úr ríkissjóði og úr Atvinnuleysistryggingasjóði samkvæmt reglum um átaksverkefni.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.