Hlutir í gjaldþrota banka hækkuðu um 950%

Slagsmál tveggja danskra tískuhúsa um hinn gjaldþrota banka, Bonusbanken, í kauphöllinni í Kaupmannahöfn hafa valdið því að hlutir í félaginu Holdingselskapet af 1958 hafa hækkað um 950% á einni viku. Þrotabúið er nær eina eign félagsins.

Fyrir viku síðan stóðu þessir hlutir í 10 aurum dönskum á stykkið og þann dag námu viðskiptin með þá litlum 400 dönskum krónum. Í gærdag námu viðskiptin hinsvegar hátt í 100.000 dönskum kr. og frá því í morgun hefur sú tala hækkað. Gengið hlutanna á hádegi í dag stóð í 98 aurum dönskum.

Tískuhúsin tvö, DK Company og Smartguy, eru ekki á leið í bankaviðskipti. Það sem þau eru á höttunum eftir er kauphallarskráning Bonusbanken sem enn er virk. Með því að eignast hana geta tískuhúsin sparað sér talsvert fé í skráningu sinni á markaðinn.

Áður en slagsmál tískuhúsanna hófust var markaðsvirði Holdingselskapet af 1958 talið nema um 3,5 milljónum danskra kr. Á hádegi í dag var það komið í yfir 37 milljónir danskra kr.