Jónas Guðni og Arnór báðir á skotskónum í gærkvöldi

Arnór Smárason og Jónas Guðni Sævarsson skoruðu báðir fyrir lið sín í gærkvöldi, Arnór í 2-1 sigri Esbjerg í dönsku úrvalsdeildinni og Jónas Guðni í 1-3 tapi Halmstad í sænsku úrvalsdeildinni.

Arnór Smárason skoraði mikilvægt mark í 2-1 útisigri Esbjerg á Lyngby. Arnór jafnaði leikinn á 57. mínútu og Esbjerg trryggði sér síðan þrjú stig með marki frá Sören Rieks á lokamínúunum. Sigurinn var gríðarlega mikilvægur fyrir Esbjerg í fallbaráttunni en eftir leikinn er Lyngby aðeins stigi á undan þó að Esbjerg sitji enn í fallsæti.

Jónas Guðni Sævarsson kom Halmstad í 1-0 á lokamínútu fyrri hálfleiks á móti sænsku meisturunum í Malmö FF á útivelli en Malmö-liðið skoraði þrjú mörk í seinni hálfleik efrir að Halmstad missti mann af velli með rautt spjald. Jónas Guðni Sævarsson átti ágætan leik á miðri miðjunni hjá Halmstad en hann fékk reyndar spjald í leiknum.