Mun betri afkoma hjá ríkissjóði en gert var ráð fyrir

Mun betri niðurstaða varð af rekstri ríkissjóðs á fyrstu tveimur mánuðum ársins en gert var ráð fyrir í áætlunum. Handbært fé frá rekstri var 5,5 milljörðum kr. meira en á sama tíma í fyrra.

Þetta kemur fram í greiðsluuppgjör ríkissjóðs fyrir fyrstu tvo mánuði ársins 2011 sem liggur nú fyrir og birt hefur verið á vefsíðu stjórnarráðsins..

Handbært frá rekstri var jákvætt um 8,9 milljarða kr. en var jákvætt um 3,4 milljarða kr. á sama tímabili í fyrra. Tekjur reyndust 1,3 milljörðum kr. hærri en í fyrra á meðan að gjöldin drógust saman um 8,5 milljarða kr. milli ára.

Innheimtar tekjur ríkissjóðs námu 82,2 milljörðum kr. á fyrstu tveimur mánuðum ársins og eru það 1,1% meiri tekjur en skiluðu sér á sama tíma í fyrra. Innheimtar tekjur voru einnig töluvert meiri en áætlun fjárlaga gerði ráð fyrir, eða 6,6 milljarða kr. meiri. Stafar það einkum af meiri innborgunum á tekjuskatti lögaðila, fjármagnstekjuskatti og vaxtatekjum en reiknað var með.