Aðvörun: Olíuverðið í 160 dollara á tunnuna

Hrávörusérfræðingar Bank of America hafa sent frá sér greiningu á þróun olíuverðs út þetta ár. Þeir telja að 30% líkur séu á að verðið nái 160 dollurum fyrir árslok. Til skamms tíma telja sérfræðingarnir að mjög sennilega fari olíuverðið í 140 dollara á tunnuna, það er á næstu þremur mánuðum.

Fjallað var um málið á sjónvarpsstöðinni CNBC. Þessi aðvörun frá sérfræðingum Bank of America kemur aðeins fáeinum dögum eftir að Alþjóðlega orkumálastofnunin sendi frá sér álit um að olíuverð í 100 dollurum á tunnuna gæti bremsað veikan efnahagsbata í heiminum.

Greiningin sem sett var fram byggir m.a. á því að aukin eftirspurn eftir olíu þessa dagana kemur á sama tíma og að framleiðslan í Líbíu hefur dregist saman um milljón tunnur á dag. Ekki er útlit fyrir að framleiðsla Líbíu fari aftur á fullt skrið í náinni framtíð. Raunar segja sérfræðingarnir að ef staðan í Líbíu versni frá því sem nú er megi búast við enn hærra olíuverði í ár.

Heimsmarkaðsverð á olíu hefur hækkað gífurlega undanfarna mánuði. Í nóvember s.l. var verðið á Brent olíunni 85 dollarar á tunnuna. Í janúar var 100 dollara múrinn rofinn og í dag stendur verðið í yfir 120 dollurum á tunnuna.