Margir telja ekkert svigrúm til launahækkana

Um 30% stjórnenda telur ekkert svigrúm til launahækkana í yfirstandandi kjaraviðræðum og 24% segja svigrúm til launahækkana vera 1-3%.

Þetta kemur fram í Viðskiptablaðinu í dag. Þar segir að 27% segja svigrúmið vera 4-6%, 15% stjórnenda segja svigrúmið 7-10% og einungis 4% segja svigrúm til launahækkana 11% eða meira. Þetta kom fram í könnun MMR sem var gerð 28. mars til 5. apríl og fjöldi svarenda var 490.

Velta fyrirtækja réð nokkru um hvort og þá hversu mikið svigrúm stjórnendur töldu til hækkana, t.d. segja 40% stjórnenda í fyrirtækjum, sem velta 199 milljónum eða minna, ekkert svigrúm til launahækkana og sama sinnis eru 32% stjórnenda fyrirtækja sem velta 200 til 999 milljónum.

Þegar veltan eykst og er á bilinu milljarður eða meira þá telja 23% ekkert svigrúm til launahækkana. Stjórnendur í meðalstórum fyrirtækjum telja sig hafa svigrúm til lítilla hækkana eða 1-3%. Þegar skoðað er hlutfall stjórnenda sem telur að laun geti hækkað um 11% eða meira er það hlutfall hæst í minnstu fyrirtækjunum sem velta minna en 199 milljónum, eða tæp 7%, en enginn stjórnandi hjá fyrirtæki með yfir milljarð í veltu telur svo mikið svigrúm vera til staðar, að því er segir í Viðskiptablaðinu.