Afgangur á vöruskiptum rúmlega 120 milljarðar í fyrra

Afgangur á vöruskiptum við útlönd nam 120,2 milljörðum króna á síðasta ári. Til samanburðar var 90,3 milljarða króna afgangur árið 2009 miðað við  gengi hvors árs.

Þetta kemur fram á vefsíðu Hagstofunnar en út er komið heftið Vöruskipti við útlönd 2010. Í ritinu kemur m.a. fram að fluttar voru út vörur fyrir 561,0 milljarða króna en inn fyrir 440,8 milljarða króna.

Vöruútflutningur jókst um 12,0% frá fyrra ári á gengi hvors árs og vöruinnflutningur um 7,0%. Hlutur sjávarafurða var 39,3% og iðnaðarvöru 55,4% en í vöruinnflutningi voru stærstu vöruflokkarnir hrá- og rekstrarvörur, fjárfestingarvörur og neysluvörur aðrar en mat- og drykkjarvörur.

Stærstu viðskiptalönd voru Holland í vöruútflutningi og Noregur í vöruinnflutningi og var EES þýðingamesta markaðssvæðið, jafnt í vöruútflutningi sem vöruinnflutningi.