Kjell Inge Røkke hvetur til meiri olíuleitar við Noreg

Aðaleigandi Aker Exploration, Kjell Inge Røkke, sem sótti um að fá að leita að olíu á íslenska Drekasvæðinu fyrir tveimur árum, segir að stórauka verði olíuleit við Noreg.

Í opnu bréfi í ársskýrslu Aker-samsteypunnar lýsir Røkke, sem er einn ríkasti maður Noregs, áhyggjum sínum um að ekki sé leitað nóg í norska landgrunninu. Hann tekur til samanburðar olíuleit meðfram ströndum Bretlands, sem hafi aukist verulega.

Røkke  er sjálfur stjórnarformaður í fyrirtækjum sem þótt hafa hvað djarftækust í olíuleit við Noregsstrendur en mátt þola vonbrigði með árangurinn á undanförnum árum. Þrátt fyrir þetta segist  Røkke bjartsýnn og telur að milljónir tunna bíði eftir því að finnast.

Fyrirtæki Røkkes, Aker Exploration, var annað tveggja fyrirtækja sem lagði inn umsókn um leit á Drekasvæðinu í fyrsta útboði íslenskra stjórnvalda fyrir tveimur árum. Fyrirtækið dró hins vegar umsóknina til baka og bar við breyttri stefnumörkun. Íslensk stjórnvöld áforma nýtt Drekaútboð síðar á þessu ári.