Danska stjórnin hefur hækkað skatta 295 sinnum

Danska ríkisstjórnin hefur hækkað skatta í Danmörku 295 sinnum eða að meðaltali tvisvar á mánuði þau tíu ár sem stjórnin hefur verið við völd. Samt sem áður hefur skattastopp verið einn af hornsteinum í pólitík hægri flokkanna frá því að þeir náðu völdum árið 2001.

Þetta kemur fram í Politiken í dag. Þar segir að þessar skattahækkanir séu tvöfalt fleiri en þær sem Anders Fogh Rasmussen þáverandi formaður Venstre sakaði jafnaðarmenn um í kosningabaráttunni árið 2001. „Á stjórnartíð Nyrup hafa skattar og gjöld hækkað einu sinni á mánuði. Það er kominn tími til að breyta því,“ skrifaði Anders Fogh Rasmussen í Politiken fyrir áratug síðan.

Bent Greve prófessor í samfélagsfræðum við háskólann í Árósum segir að mikill fjöldi skattahækkana sé ekki óeðlilegur í sjálfu sér en komi verulega á óvart þegar litið er til stefnunnar um skattastopp.

Mads Röring talsmaður Venstre í skattamálum bendir á að þrátt fyrir fjölda skattahækkana hafi skattbyrði almennings í Danmörku í heild lækkað úr 48,6% af landsframleiðslu landsins og niður í 46,4% á síðasta ári.