Olíumálaráðherra Noregs skipt út

Olíu- og orkumálaráðherra Noregs, Terje Riis-Johansen, lét af embætti í dag. Eftirmaður hans er Ola Borten Moe, 34 ára gamall þingmaður frá Þrándheimi, sem norskir fjölmiðlar kalla krónprins Miðflokksins.

Vangaveltur hafa verið í norskum fjölmiðlum að undanförnu um að olíu- og orkumálaráðherranum kynni að verða skipt út. Það kom því ekki alveg á óvart þegar tilkynnt var um ráðherraskiptin í dag.

Terje Riis-Johansen hefur setið undir harðri gagnrýni þau tvö ár sem hann hefur gegnt embættinu, sem litið er á sem eitt það mikilægasta í Noregi. Hann þótti komast illa frá deilum um lagningu nýrrar háspennulínu um Harðangursfjörð og fréttir af mengun frá olíuhreinsunarstöðinni í Mongstad, norðan Björgvinjar, sköðuðu einnig feril hans.

Þá hafa talsmenn olíuiðnaðarins verið ósáttir við hversu hægt hefur gengið undir forystu olíumálaráðherrans að afla fylgis við olíuleit á nýjum svæðum undan Noregsströndum við Lófót og í Vesturál.Til að slá á þá gagnrýni ákvað Terje Riis-Johansen í fyrra að hefja undirbúning að olíuleit við Jan Mayen, en sú ákvörðun gæti haft mikla þýðingu fyrir olíuleit á íslenska Drekasvæðinu.

Norskir fjölmiðlar segja að Terje Riis-Johansen hyggist nú sækjast eftir útnefningu Miðflokksins til framboðs í embætti fylkisstjóra í heimahéraði sínu, Þelamörk.