Kaupþing yfirtók risavaxið lán Ólafs ári fyrir hrun

Kaupþing yfirtók risavaxið lán Ólafs Ólafssonar hjá amerískum banka ári fyrir hrun, en án þess hefðu hlutabréf Kaupþings lækkað mikið í verði. Á svipuðum tíma var bankinn að gera gjaldeyrissamning við Ólaf, sem nú krefst 115 milljarða króna frá þrotabúi Kaupþings vegna gjaldeyrissamningsins.

Egla dótturfélag Kjalars, sem var í eigu Ólafs Ólafssonar, fékk lán hjá bandaríska bankanum Citigroup gegn veði í hlutabréfum í Kaupþingi banka. Haustið 2007 fóru gjaldfellingarákvæði í lánasamningi hjá bandaríska bankanum að verða virk vegna lækkandi hlutabréfaverðs hjá Kaupþingi banka.

Félag Ólafs gat í krafti stöðu hans í hluthafahópi bankans fengið Kaupþing til að taka yfir lánið hjá bandaríska bankanum í lok árs 2007, en á þessum tíma voru hagsmunir bankans og Ólafs orðnir mjög samtvinnaðir. Bankinn vildi ekki með nokkrum hætti offramboð á bréfum bankans á markað með tilheyrandi lækkun þeirra.

Samkvæmt heimildum fréttastofu gerði Citigroup fyrst veðkall en síðan gjaldfelldi bankinn lánið. Þá tók Kaupþing lánið yfir í heild sinni og færði síðan hluta þess yfir á aðra banka og sparisjóði gegn góðum tryggingum. Hjörleifur Þór Jakobsson, forstjóri Kjalars, sagði í samtali við fréttastofu í dag að endurfjármögnun á láninu hjá Citigroup hafi verið að fullu lokið í mars 2008.

Stuttu áður, í janúar 2008, veitti fékk Kjalar gjaldeyrisskiptasamning í hjá bankanum upp á tugi milljarða króna. Fram kom í Viðskiptablaðinu að þessi samningur hafi síðan verið endurnýjaður í miðju bankahruni. Á grundvelli hans gerir Kjalar kröfu um 115 milljarða króna, en það er hagnaður félagsins á átta daga tímabili í miðju hruni.

Ef Kjalar vinnur málið skiptast eignir félagsins milli Glitnis og Eglu. Í yfirlýsingu sem Kjalar sendi frá sér segir að óháð niðurstöðu málsins sé ljóst að eigendur Kjalars muni aldrei fá krónu út úr félaginu. Hjörleifur Þór Jakobsson, forstjóri Kjalars, fullyrti í samtali við fréttastofu í dag að engin félög tengd Ólafi Ólafssyni ættu kröfur á Eglu og þar með ætti hann ekki lengur fjárhagslegra hagsmuna að gæta í félaginu.