Arion íhugar að áfrýja dómi vegna fasteignaláns

Arion banki skoðar nú hvort áfrýja skuli dómi í máli Sjómannafélags Íslands gegn bankanum. Héraðsdómur Reykjavíkur dæmdi í gær bankann til að endurgreiða Sjómannafélagi Íslands tæpar sex milljónir króna vegna ólöglegs gengistryggðs láns.

Orlofssjóður félagsins hafði tekið 15 milljóna króna lán til kaupa á íbúð í Reykjavík sumarið 2007. Lánið var greitt upp hraðar en gert var ráð fyrir, eða á tæpum þremur árum, og námu þá raungreiðslur til bankans tæpum 37 milljónum. Sjómannafélagið stefndi svo bankanum og vildi fá til baka það sem félagið taldi sig hafa ofgreitt.

Sjómannnafélagið krafðist þess að fá tæpar 20 milljónir endurgreiddar frá Arion, en Héraðsdómur Reykjavíkur taldi að bankinn skyldi ekki endurgreiða allt heldur tæpar 5,9 milljónir króna vegna þess að bankinn hefði ekki tekið við kröfunni frá Kaupþingi banka fyrr en í byrjun árs 2010.