Eignir tryggingarfélaga lækka

Heildareignir tryggingarfélaganna námu 147,4 milljörðum kr. í lok febrúar og lækkuðu um 1,2 milljarða kr. á milli mánaða.

Þetta kemur fram í hagtölum Seðlabankans. Útlán og markaðsverðbréf námu 91,8 milljörðum kr. og lækkuðu um 1,4 milljarða kr. í febrúar sem stafar að mestu leyti af lækkun í öðrum útlánum sem námu 12,1 milljarði kr. og lækkun í verðtryggðum markaðsskuldabréfum sem námu 48,8 milljörðum kr.

Handbært fé nam 11,9 milljarði kr. og hækkaði um 817 milljónir kr. á milli mánaða. Skuldir tryggingarfélaga námu 89,5 milljörðum kr. og lækkuðu um 1,3 milljarða kr. í lok febrúar.