Reykjaneshöfn í vanskilum með skuldabréfaflokk

Reykjaneshöfn er í vanskilum með gjalddaga 1. maí sl. vegna greiðslu afborgana og vaxta af skuldabréfaflokki RNH08.

Þetta kemur fram í tilkynningu til Kauphallarinnar. Þar segir að Reykjaneshöfn hefur með aðstoð Reykjanesbæjar staðið í endurfjármögnun á langtímalánum Reykjaneshafnar, en lánaútboð Reykjanesbæjar hefur enn ekki borið árangur.

Tafir við uppbyggingu álvers Norðuráls í Helguvík og fleiri verkefna til atvinnuuppbyggingar í Reykjanesbæ hafa átt sinn þátt í að lánaútboðið bar ekki árangur, og að lokum neikvæður fréttaflutningur af málefnum Reykjanesbæjar.

Reykjaneshöfn átti einnig von á tekjum vegna lóðagjalda í Helguvík, sem hafa enn ekki komið, en eru væntanlegar á næstu vikum. Þær eru vegna Íslenska kísilversins ehf., Norðuráls ofl. Einnig hafa óskir Reykjaneshafnar um ríkisstyrk við hafnarframkvæmdir í Helguvík ekki borið árangur.

Búið er að greiða hluta vanskilanna og semja um fullnaðar uppgjör innan tveggja mánaða.