Seldu minkaskinn fyrir hátt í 300 milljónir í Kaupmannahöfn

Björn Halldórsson formaður Sambands íslenskra loðdýraræktenda segir að á uppboðinu sem nú stendur yfir hafi um 50.000 íslensk minkaskinn selst á að meðalverðið á þeim hafi verið á bilinu 5.500 til 6.000 kr. stykkið. Þetta er nokkru minna verð en fengist hefur fyrir skinnin á fyrri uppboðum ársins en Björn segir að það stafi af því að skinnin sem nú voru seld eru í lélegri gæðaflokkum en á fyrri uppboðum árisins. Meðalverðið hefur hingað til legið á bilinu 7.000 til 8.000 kr.

„Verðið á minkaskinnum hefur verið hátt undanfarið ár og allt bendir til að það haldist hátt á næstu árum," segir Björn. „Ekkert lát er á eftirspurn eftir þessum skinnum í Kína og Rússland er aftur að koma inn á markaðinn sem stór kaupandi. Á móti lítur ekki út fyrir að framboðið aukist á næstunni."

Visir.is hefur áður greint frá því að söluverðmæti minkaskinna frá íslenskum loðdýraræktendum í ár mun að minnsta kosti nema einum milljarði króna en fyrir tæpum áratug var talið að þessi búgrein ætti vart framtíð fyrir sér.

Alls voru íslensk minkaskinn seld fyrir 370 milljónir króna á uppboði hjá Kopenhagen Fur í lok júní. Um var að ræða þriðja uppboð ársins en á hinum tveimur seldust íslensk minkaskinn fyrir rúmlega 400 milljónir króna. Með uppboðinu nú er söluverðmætið því orðið í kringum 1,1 milljarð kr.