Rataði aftur í hús skáldsins

Munnharpa Davíðs Stefánssonar frá Fagraskógi rataði heim í Davíðshús á Akureyri í vikunni, eftir að hafa verið löngu talin glötuð.

Jón B. Guðlaugsson kom færandi hendi á miðvikudag með slitna munnhörpu sem Davíð átti forðum daga en hana hafði Árni Kristjánsson, fyrrverandi tónlistarstjóri Ríkisútvarpsins, gefið Jóni seint á síðustu öld. Árni og Davíð voru miklir vinir og í bókinni Endurminningar samferðamanna skrifaði Árni kafla um Davíð vin sinn og nefnir þar meðal annars að hann hafi orðið vitni að því að skáldið kunni listavel að spila á munnhörpu. - sv