Verðbólgan heldur áfram að hjaðna hérlendis

Verðbólgan hér á landi var 5,1% í september samkvæmt samræmdri vísitölu neysluverðs sem Hagstofa Evrópusambandsins (e. Eurostat) tekur saman og Hagstofa Íslands birti nú í morgun. Minnkar því verðbólgan um 0,8 prósentustig milli mánaða en hún var 5,9% hér á landi í ágúst samkvæmt vísitölunni.

Fjallað er um málið í Morgunkorni greiningar Íslandsbanka. Þar segir að á þennan mælikvarða hefur verðbólgan hjaðnað umtalsvert síðasta árið en í september í fyrra mældist hún 15,3%.

Meginástæða hjöðnunar verðbólgunnar er að áhrif gengislækkunar krónunnar á verðbólgu sem varð í aðdraganda og samhliða hruni bankakerfisins hér á landi á árinu 2008 eru nú nær horfin og tekin eru við áhrif styrkingar krónunnar frá upphafi árs.

Í samanburði við önnur ríki Evrópska efnahagssvæðisins (EES) var verðbólgan þriðja mest hér á landi í september. Þetta er þriðji mánuðurinn í röð sem Ísland trónir ekki á toppnum á þessum lista en eins og kunnugt er þá hafði verðbólgan mælst mest hér á landi allt frá því í ágúst árið 2008.

Í september síðastliðnum mældist verðbólgan mest í Rúmeníu, 7,7%, og næstmest á Grikklandi, 5,7%. Verðbólgan eykst nokkuð milli ágúst og september innan ríkja EES, eða úr 2,0% í 2,2%. Aðeins Írland upplifði ástand verðhjöðnunar í september en þar hefur samræmd vísitala lækkað um 1,0% á síðustu tólf mánuðum. Ekki er við öðru að búast en að munurinn á Íslandi og öðrum EES-löndum haldi áfram að fara minnkandi næsta kastið.