Eignir sjóða svipaðar og í árslok 2004

Eignir verðbréfa- og fjárfestingarsjóða námu 282,5 milljarða kr. í lok október og lækkuðu um 1,4 milljarða kr. á milli mánaða.

Þetta kemur fram í hagtölum Seðlabankans. Samkvæmt línuriti sem fylgir með upplýsingunum eru eignir nú svipaðar og þær voru í árslok 2004 hjá þessum sjóðum. Mestar urðu þær í lok ársins 2007 eða hátt í 800 milljarðar kr.

Eignirnar í lok október eru 93% innlend verðbréf sem lækkuðu um 3 milljarða kr. og námu 262,9 milljörðum kr. í lok mánaðarins. Þar af námu íbúðabréf 93,3 milljörðum kr. og önnur ríkisbréf 96 milljörðum kr. Erlend verðbréf námu 9,7 milljörðum kr. og lækkuðu um 351 milljónir kr.

Í lok október var opið fyrir viðskipti með hlutdeildarskírteini í 53 sjóðum. Auk þess voru 16 sjóðir í slitaferli taldir með í birtum gögnum í október, þar sem verið er að gera upp eignir sjóðanna áður en þeim verður lokað.