Eignir innlánsstofnana nema rúmum 3.000 milljörðum

Heildareignir innlánsstofnana námu 3.009 milljörðum kr. í lok mars 2010 og heildarskuldir 2.692 milljörðum kr.



Innlán í mars námu 61% af heildarskuldum innlánsstofnana eða 1.639 milljörðum kr. samanborið við 23% í september 2008. Hafa innlánin því nær þrefaldast sem hlutfall af heildarskuldum frá haustinu 2008.

Þetta kemur fram í hagtölum Seðlabankans. Þar segir að vegna bankahrunsins í október 2008 hefur Seðlabankinn ekki haft tök á að birta heildstæðar tölur yfir íslenskt bankakerfi frá þeim tíma. Undanfarið hefur verið unnið að því að vinna upp skýrslur frá október 2008.

Nú liggja fyrir bráðabirgðagögn fyrir desember 2008, desember 2009 og fyrsta ársfjórðung 2010 í fullri sundurliðun. Upplýsingarnar byggja á gögnum frá bönkum og sparisjóðum eins og þau liggja fyrir á hverjum tíma.

Þar sem töluverð óvissa ríkir um mat á eignum í kjölfar bankahrunsins kunna gögnin að breytast eftir því sem áreiðanlegra verðmat verður til.