Umfangsmiklar skattahækkanir ákveðnar

Fjármagnstekjuskattur og tekjuskattur fyrirtækja hækkar í 20% og erfðafjárskattur tvöfaldast, en lög þessa efnis voru samþykkt á Alþingi í gær. Alls er talið að skattahækkanir skili ríkissjóði rúmum 10 milljörðum á næsta ári.

Umfangsmiklar skattahækkanir voru samþykktar á Alþingi í gær. Sérstakur skattur verður lagður á fjármálafyrirtæki. Markmiðið með bankaskatti er tvíþætt. Annars vegar að bankarnir taki þátt í að mæta þeim mikla kostnaði sem fallið hefur á ríkissjóð vegna hruns fjármálakerfisins. Hins vegar að draga úr áhættusækni fjármálafyrirtækja en skatturinn er lagður á skuldir banka.

Fjármagnstekjuskattur einstaklinga hækkar úr 18% í 20% en talið er að sú hækkun skili einum og hálfum milljarði í ríkiskassann. Tekjuskattur fyrirtækja hækkar úr 18 í 20 prósent og auðlegðarskatturinn sem kynntur var til sögunnar í fyrra hækkar úr 1,25% í eitt og hálft prósentustig. Samhliða því lækka fríeignamörkin úr 90 milljónum í 75 hjá einstaklingum og úr 120 í 100 milljónir hjá hjónum. Þetta á að skila 1,5 milljarði. Erfðafjárskattur hækkar úr 5 í 10 prósent. Tóbaksgjald hækkar um 3%. Þá verður lagt á sérstakt vörugjald í komuverslunum fríhafna en talið er að það muni skila 600 milljónum. Kolefnisgjald hækkar úr 50 í 75% og heimildir til útgreiðslu séreignasparnaðar verða rýmkaðar en þessi aðgerð á að skila 3 milljörðum. Samtals er áætlað að skattahækkanir skili rúmum 10 milljörðum í ríkiskassann á næsta ári. Til samanburðar er vert að geta þess að skorið er niður um rúma 30 milljarða króna.

Talsmenn atvinnulífsins gagnrýndu þessar aðgerðir á fundum efnahags- og skattanefndar og telja að þær hafi neikvæð áhrif á endurreisnina. Erfðafjárskattur og auðlegðarskattur væru ósanngjarnir. Efnahags- og skattanefnd ræddi einnig hvort auðlegðarskatturinn gæti leitt til landflótta efnaðs fólks og jafnvel skilnaðar hjóna í því skyni að komast undan skattheimtunni.