Tal sett í söluferli

Fjarskiptafyrirtækið Tal, sem er þriðja stærsta fjarskiptafyrirtæki á Íslandi og er að stærstum hluta í eigu Landsbankans, hefur verið sett í söluferli en það var eitt af skilyrðum sáttar sem fyrirtækið gerði við Samkeppniseftirlitið.

Tal var að að meirihluta í eigu Teymis, sem átti Vodafone, Skýrr, EJS og fleiri fyrirtæki og var yfirtekið af kröfuhöfum á síðasta ári, en stærsti hluthafi Teymis er Landsbankinn með tæplega sextíu prósenta hlut.

Nú hafa hluthafar Tals falið Tindum verðbréfum að annast söluferli á Tali og verður allt hlutafé í fyrirtækinu selt. Söluferlið er opið öllum fagfjárfestum sem geta sýnt fram á fjárfestingargetu umfram 300 milljónir króna.

Tal hefur verið rekið undanfarin ár í skugga samkeppnisbrota og harvítugra deilna milli eigenda, þeirra Jóhanns Óla Guðmundssonar og forstjórans Hermanns Jónassonar og svo Teymis, sem fór með meirihluta í félaginu. Deilur þessar voru sprottnar af því að Hermann gerði í desember árið 2008 reikisamning við Símann, helsta samkeppnisaðila Vodafone, sem var jafnframt í eigu Teymis. Forstjórinn gerði þetta á rekstrarlegum forsendum að sögn, um væri að ræða hagstæðari samning, en fulltrúar Teymis í stjórn Tals litu á þetta sem svik. Deilurnar lutu síðan m.a hver væri bær til að fara með stjórn í félaginu og gengu þær svo langt að fyrrverandi forstjóri Tals, Ragnheiður Ágústsdóttir, kærði Jóhann Óla Guðmundsson, annan aðaleiganda Tals, og lögmann hans fyrir frelsissviptingu. Síðan þá hefur Teymi runnið í faðm kröfuhafa og Landsbankinn hefur tekið yfir hlut Jóhanns Óla í Tali.

Í sátt sem Teymi gerði á síðasta ári við Samkeppniseftirlitið vegna samkeppnisbrota var Teymi gert skylt að selja hlut sinn í Tali innan tveggja ára. Reyndar hvíldi leynd yfir tímamarkinu í ákvörðun Samkeppniseftirlitsins en greint var frá því í fjölmiðlum að tímamarkið væri tvö ár og rímar það við auglýsingu hluthafa núna um að fyrirtækið sé til sölu.