Skattaskýrsla fæðist

„Við erum að leggja lokahönd á áfangaskýrsluna. Hún verður afhent ráðherra í vikunni,“ segir Maríanna Jónasdóttir, fulltrúi Steingríms J. Sigfússonar fjármálaráðherra og formaður starfshóps á vegum fjármálaráðuneytis, sem leggja á fram heildstæðar tillögur að breytingum á skattkerfinu.

Starfshópurinn var settur á laggirnar seint í apríl og átti að skila fyrstu áfangaskýrslu 15. júlí. Erfiðlega gekk að setja saman samráðsnefnd hagsmunaaðila sem vinnur með hópnum og var skilafrestur því framlengdur til 31. ágúst.

Maríanna segir samvinnuna hafa skilað miklu og hefur ekki áhyggjur af töfum enda hafi ríkisstjórnin haft öðrum hnöppum að hneppa upp á síðkastið. Lokatillögum á að skila fyrir áramót.- jab