Amerískur risi kaupir íslenska dvergkafbáta

Bandaríska hátæknifyrirtækið Teledyne Benthos keypti í gær íslenska nýsköpunarfyrirtækið Hafmynd, sem þróar og framleiðir dvergkafbáta. Seljendur eru Nýsköpunarsjóður atvinnulífsins, Mallard Holding (félag Össurar Kristinssonar) og smærri hluthafar. Fyrirtækjaráðgjöf Saga Capital hafði milligöngu um söluna.

Ekki fæst uppgefið hvað Teledyne greiddi fyrir Hafmynd, en samkvæmt lauslegri áætlun gæti verðið verið á milli 800 og 1.000 milljónir króna.

Thomas W. Altshuler, framkvæmdastjóri Teledyne Benthos og Teledyne Webb Research, sem gekk frá kaupunum í gær, segir stefnt að því að hönnun og þróun GAVIA-dvergkafbáts Hafmyndar verði áfram hér á landi. Þá sé í skoðun að stofna hér sérstaka þjónustudeild með prófunaraðstöðu fyrir aðra tengda framleiðslu fyrirtækisins. Félögin sem Altshuler fer fyrir heyra undir sjávartæknisvið Teledyne Technologies Incorporated samstæðunnar. Hún er risavaxin að umfangi, með hagnað upp á 28,6 milljónir dala (3,3 milljarða króna) á öðrum fjórðungi þessa árs. Félagið þjónar meðal annars olíu- og gasleitarfyrirtækjum, rannsóknastofnunum og sjóherjum.

Altshuler segir að núna verði lagst í að meta fremur samlegðar­áhrif vegna kaupanna og koma verði í ljós hvort, eða hvernig starfsemin hér á landi verði efld. Teledyne Benthos hafi þróað ómannaða kafbáta sem hafa aðra eiginleika en GAVIA-bátarnir, sem henti fremur til langsiglinga og gagnasöfnunar í hafinu. Samlegðaráhrifin séu því mikil. Til þessa hafa fimmtán GAVIA-kafbátar verið seldir, en Benthos hafi selt milli fjörutíu og fimmtíu af sínum bátum á ári hverju. „Við teljum að sala Hafmyndar til þessa sé bara toppur ísjakans," segir hann og segir stefnt að því að árleg sala GAVIA-báta fari í tíu til fimmtán á ári.

Hjá Hafmynd starfa átján manns og segir Júlíus Benediktsson framkvæmdastjóri að engar breytingar séu fyrirhugaðar á mannahaldi í tengslum við eigendaskiptin. Hann fagnar aðkomu Teledyne og segir hana viðurkenningu á um fjórtán ára þróunarstarfi. Markaður fyrir kafbáta Hafmyndar sé afar sérhæfður og lykillinn að frekari árangri aðkoma jafnöflugs samstarfsaðila og Teledyne.

Nýsköpunarsjóður atvinnulífsins átti 31,6 prósenta hlut í Hafmynd. „Við seljum okkur út með hagnaði og fáum góða ávöxtun sem við getum sett í önnur félög," segir Helga Valfells, framkvæmdastjóri sjóðsins. Hún fagnar því að Teledyne skuli ekki láta efnhagsaðstæður hér á landi fæla sig frá, heldur sjái tækifæri sem orðið hafi til í krafti íslensks hugvits.

olikr@frettabladid.is