Nauðungarsölur fasteigna orðnar jafnmargar og allt árið í fyrra

Í lok ágúst 2010 höfðu 205 fasteignir verið seldar nauðungarsölu hjá sýslumanninum í Reykjavík á árinu. Þetta er nánast sami fjöldi og allt árið í fyrra þegar 207 fasteignir voru seldar nauðungarsölu.

Þetta kemur fram á vefsíðu sýslumannsins í Reykjavík. Þar má sjá að sprenging hefur orðið á fjölda nauðungarsalna á fasteignum í sumar en þær voru samtals 141 í júní, júlí og ágúst. Til samanburðar var fjöldinn 59 á þremur fyrstu mánuðum ársins.

Skráðar nauðungarsölubeiðnir vegna fasteigna voru orðnar 1.195 talsins í lok ágúst. Skráðar nauðungarsölubeiðnir vegna fasteigna voru 2.504 allt árið í fyrra.