Eignir aukast hjá verðbréfa- og fjárfestingarsjóðum

Eignir verðbréfa- og fjárfestingarsjóða námu 263,9 milljarða kr. í lok júní og hækkuðu um 14,7 milljarða kr. milli mánaða eða um 5,9%.

Þetta kemur fram í hagtölum Seðlabankans. Þar segir að innlend verðbréf hækkuðu um 14,1 milljarða kr. í mánuðinum, þar af nam hækkun ríkisbréfa 13,1 milljörðum kr. Eignir verðbréfa og fjárfestingasjóða eru að 94% innlend verðbréf sem að stærstum hluta eru ríkistryggð verðbréf og innlán.

Í lok júní var opið fyrir viðskipti með hlutdeildarskírteini í 53 sjóðum. Auk þess voru 17 sjóðir í slitaferli taldir með í birtum júní gögnum, þar sem verið er að gera upp eignir sjóðanna áður en þeim verður lokað.