Lítil batamerki í verslun fyrir utan raftækjaverslun

Þrátt fyrir að vísbendingar um t.d. kortaveltu landsmanna bendi nú til þess að einkaneysla sé að hrökkva í gang á nýjan leik segja hagtölur um verslun aðra sögu. Enn sem komið er sjást ekki batamerki í veltu í verslunum að raftækjaverslun undanskilinni, en velta í raftækjaverslunum hefur nú aukist mikið undanfarna 5 mánuði.

Þetta kemur fram í Morgunkorni greiningar Íslandsbanka. Þar segir að verslun með dagvöru, áfengi, föt, skó, húsgögn og rúm er hinsvegar enn að dragast saman þegar borið er saman við sama mánuð fyrir ári síðan á föstu verðlagi. Þetta er meðal þess sem fram kemur í tölum um veltu í smásöluverslun í októbermánuði sem Rannsóknarsetur verslunarinnar birti í lok síðustu viku.



Frá sama mánuði fyrra árs dróst velta í dagvöruverslun saman um 0,8% á föstu verðlagi. Þrátt fyrir samdrátt er þetta engu að síður mun minni samdráttur en verið hefur undanfarin misseri. Fyrir ári síðan nam t.d. samdráttur í dagvöruverslun á þennan mælikvarða 4%.

Þá hefur velta í áfengisverslun dregist saman um 8,3% í október borið saman við sama mánuð fyrra árs á föstu verðlagi, en fyrir ári síðan nam samdráttur í sölu áfengis 25% á þennan mælikvarða.

Frá því um mitt þetta ár hefur veltan í dagvöruverslun verið nokkuð stöðug. Velta í áfengisverslunum heldur hinsvegar áfram að dragast saman og hefur nú dregist saman um 35% að raunvirði frá því fyrir hrun.

Má gera því skóna að stærri hluti þess áfengis sem landsmenn neyta sé nú fenginn eftir öðrum leiðum en úr verslunum ÁTVR, miðað við það sem var fyrir hrun., s.s. með heimabruggun, landakaupum eða smygli, að því er segir í Morgunkorninu.