N1 greiðir skuldir eigendanna

Olíuverðstríð í byrjun sumars kostaði N1 þrjú hundruð milljónir. Félagið er í sjálfskuldarábyrgð við móðurfélagið sem gat ekki greitt milljarðaskuldir um mitt ár. Eigendur gætu selt reksturinn, segir forstjóri Hermann Guðmundsson.

„Þetta er ekki meira áhyggjuefni en hver önnur endurfjármögnun,“ segir Hermann Guðmundsson, forstjóri N1, en félagið þarf að greiða rúma 16,3 milljarða króna á næstu átta mánuðum.

Líkt og fram kom í hálfsársuppgjöri olíuverslunarinnar sem birt var síðdegis á þriðjudag rennur upp gjalddagi á skuldabréfaflokki N1 í íslenskum krónum upp á rúman 7,1 milljarð króna í lok maí næsta ári. Við það bætast tæplega 9,2 milljarða króna skuld BNT, móðurfélags N1 og tengdra félaga, sem olíuverslunin er í sjálfsskuldarábyrgð fyrir.

Greint var frá því í júlí að hluti lána BNT hafi verið kominn á gjalddaga og hafi ekki verið greitt af þeim á árinu. Unnið er að fjárhagslegri endurskipulagningu skuldanna.

Bræðurnir Benedikt og Einar Sveinssynir, kenndir við Engeyjar­ættina, eiga helmingshlut í BNT í gegnum fjárfestingafélögin Mátt og Hafsilfur. Bræðurnir tengdust ýmsum viðskiptagjörningum, svo sem með Karli og Steingrími Wernerssonum. Máttur og BNT voru stórir lántakendur Glitnis með tæplega 100 milljóna evra lán hvort við fall bankans, líkt og fram kemur í rannsóknarskýrslu Alþingis.

Ofan á slæma stöðu helstu eigenda N1 litast afkoma olíuverslunarinnar af þrengingum í hagkerfinu. Félagið tapaði 191 milljón króna á fyrstu sex mánuðum ársins sem er talsverður viðsnúningur frá 474,2 milljóna hagnaði á sama tíma í fyrra. Árshlutauppgjörið hefur ekki verið verra frá því BNT tók við rekstrinum árið 2006.

Hermann segir vart hægt að bera uppgjörið nú saman við síðasta ár, en þá var metafkoma. Hann segir aðstæður oft hafa verið betri en nú um stundir. Eftirspurn eftir eldsneyti hafi dregist saman ásamt því sem miklu af framkvæmdum sé lokið og hið opinbera hafi dregið saman í rekstri sínum. Ofan á allt kostaði olíuverðstríð N1 við hin olíufélögin, sem stóð yfir í maí og júní, þrjú hundruð milljónir króna.

Eignir N1 námu tæpum 25,8 milljörðum króna í lok júní og nam eigið fé félagsins rúmum 6,4 milljörðum króna. Langtímaskuldir á móti námu 19,3 milljörðum króna. Þar af nema skammtímaskuldir 18,8 milljörðum króna. Við þær bætast skuldir eigendanna, BNT, sem ekki voru greiddar. Spurður hvernig N1 geti borið alla þá skuldabyrði sem hvíli á rekstrinum svarar Hermann því til að farið verði að vinna í endurfjármögnun skuldabréfaflokksins þegar nær dragi áramótum. Um skuldir eigendanna segir hann: „BNT gæti selt N1 og greitt upp skuldir sína. Það er valkostur en hefur ekki verið skoðaður í neinni alvöru.“

jonab@frettabladid.is