Verðlagning fyrirtækja orðin eðlilegri

Auður Capital tapaði 26 milljónum króna á fyrstu sex mánuðum þessa árs. Til samanburðar nam tapið á sama tíma í fyrra 55 milljónum.

Í uppgjöri fjármálafyrirtækisins sem birt var í gær kemur fram að tekjur fyrirtækisins hafi numið 315 milljónum króna samanborið við 178 milljónir króna árið á undan. Það jafngildir 77 prósenta aukningu á milli ára. Rekstrarkostnaður jókst að sama skapi. Hann nam 327,5 milljónum króna, sem er 42 prósentum meira en í fyrra.

Eignir í stýringu hjá Auði Capital námu 27 milljörðum króna í lok júní og er það sextíu prósenta aukning á milli ára. Eigið fé í enda tímabilsins nam 1,1 milljarði og stóð eiginfjárhlutfallið í 85 prósentum.

Aukið umfang Auðar Capital endurspeglast ekki síst af því hversu ungt fjármálafyrirtækið er. Auður Capital var stofnað árið 2007 og hóf formlega störf skömmu eftir áramótin 2008.

Fjárfestingarsjóðurinn Auður I var settur á laggirnar snemma sama ár með fjárfestingum frá 23 fjárfestum, svo sem helstu lífeyrissjóðum landsins. Eftir því sem næst verður komist hafa þeir greitt þjónustugjöld fyrir eignir í stýringu síðan þá þótt fjárfestingar hafi að mestu legið niðri þar til á þessu ári. Sjóðurinn á nú meðal annars fjarskiptafélagið Tal, heilsuvörubúðina Yggdrasil auk fimmtungshlutar í Securitas og Gagnavörslunni.

Kristín Pétursdóttir, forstjóri Auðar Capital, er sátt við afkomu félagsins miðað við þær aðstæður sem ríkt hafi í efnahagslífinu. Hún segir ástæðuna fyrir því að fjárfestingar hafi dregist þá að fyrirtæki hafi almennt verið of hátt verðlögð á sama tíma og blikur voru á lofti. Auður Capital hafi því farið sér hægt í upphafi. „Við höfum unnið mjög lengi með næstum öll verkefnin okkar, sum í eitt og hálft ár. En það hefur verið frost á markaðnum og erfitt að ljúka fjárfestingarverkefnum. Það er tilviljun að það losnaði um allt í vor,“ segir Kristín. „Við erum með nokkrar aðrar fjárfestingar sem við höfum unnið að lengi. Þeirri vinnu munum við vonandi ljúka á næstu vikum og mánuðum enda verðlagning fyrirtækja orðin eðlilegri,“ segir hún.- jab