Hagnaður Össurar hf. 444 milljónir á þriðja ársfjórðungi

Össur hf. hagnaðist um 444 milljónir kr. á þriðja ársfjórðungi ársins. Þetta er 111 milljón kr. minni hagnaður en á sama tímabili í fyrra. Stjórn Össurar er samt ánægð með árangurinn.

Í tilkynningu um uppgjörið segir að söluvöxtur á þriðja ársfjórðungi var 7% mælt í staðbundinni mynt. Salan nam alls 87 milljónum Bandaríkjadala, eða rúmlega 9,6 milljörðum kr. samanborið við 84 milljón dala á þriðja ársfjórðungi í fyrra. Góð Söluaukning var á spelkum og stuðningsvörum eða um 12%, mælt í staðbundinni mynt. Sala á stoðtækjum jókst um 3%.

EBITDA framlegð nam 19 milljónum Bandaríkjadala eða 22% af sölu. Framlegð nam 54 milljónum dala eða 62% af sölu. Framlegð er áfram stöðug. Hagnaður á tímabilinu nam 4 milljónum Bandaríkjadala, eða 444 milljónum kr., samanborið við 5 milljónir dala á sama tímabili í fyrra. Neikvæð gengisáhrif á fjármagnsliði höfðu töluverð áhrif á hagnað.

"Sala á spelkum og stuðningsvörum heldur áfram að vera góð og þá sérstaklega í Bandaríkjunum. Mikið af nýjum vörum hefur komið út á árinu og við erum ánægð með að nýjar spelkur og stuðningsvörur hafa jákvæð áhrif á söluvöxt á fjórðungnum," segir Jón Sigurðsson, forstjóri Össurar.

„Meðal nýrra vara sem voru kynntar á fjórðungnum er PROPRIO FOOT sem er önnur varan í Bionic vörulínu Össurar. Bionic vörulínan hefur skapað spennu og eftirvæntingu á markaðnum og erum við staðföst í að þróa þessa vörulínu enn frekar."