Íslandssjóðir tilkynna slit á Sjóði 1 og Sjóði 11

Í tilkynningu til Kauphallarinnar segir að undanfarna mánuði hefur verið unnið að því að finna leið til að opna aftur Sjóð 1-Skuldabréf og Sjóð 11-Fyrirtækjaskuldabréf með hagsmuni sjóðfélaga að leiðarljósi. Til stóð að opna fyrir viðskipti ef aðstæður leyfðu.

Þrátt fyrir að sjóðurinn hafi tryggt góðan seljanleika til að mæta miklum innlausnum er sú hætta fyrir hendi að erfitt geti verið að selja fyrirtækja- og sveitarfélagabréf í eigu sjóðsins. Við slíkar aðstæður, þar sem mögulegar innlausnir geta orðið miklar, er hætta á að eignasamsetning sjóðsins riðlist verulega á mjög skömmum tíma.

Slit Sjóðs 1 og Sjóðs 11 fela í sér að allt laust fé verður greitt út til sjóðfélaga, þ.e. innlán og andvirði ríkisskuldabréfa. Greitt var úr sjóðunum þann 8. febrúar s.l. og er útgreiðsluhlutfall nú 69,2% af heildareignum fyrir Sjóð 1 og 73,9% fyrir Sjóð 11.

Í framhaldi er stefnt að útgreiðslum tvisvar á ári af þeim eignum sem eftir standa og munu útgreiðslur ráðast af endurheimtum og sölu skuldabréfa á hverjum tíma.