Málskostnaður slitastjórnar í New York 375 milljónir

Slitastjórn Glitnis banka segir að kostnaður við málssókn gegn fyrrum hluthöfum og stjórnendum Glitnis fyrir dómstóli í New York nemi nú 375 milljónum króna. Heildarkostnaður þrotabúsins vegna rannsókna til að endurheimta fé nemur 1,2 milljörðum króna.

Í tilkynningu frá slitastjórninni segir að sá kostnaður sé ekki hár samanborið við þá hagsmuni sem slitastjórn sé að berjast fyrir að ná til baka til kröfuhafa. „Ákvörðun um málsókn var tekinn á grundvelli ráðgjafar virtrar bandarískrar lögmannsstofu enda snérist málareksturinn að grunni til um útboð sem fór fram í Bandaríkjunum og á grundvelli þarlendra laga," segir ennfremur.

„Þess utan háttar svo til að margir hinna stefndu eru með lögheimili utan Íslands. Þá er vakin á því athygli að málinu var vísað frá með skilyrðum um viðurkenningu hinna stefndu á lögsögu íslenskra dómstóla og aðfararhæfi og þess utan var hverjum aðila málsins gert að bera sjálfur sinn kostnað," segir einnig.

Þá segir slitastjórnin að u.þ.b. 90% kröfuhafa Glitnis séu erlendir „og eignir að lang mestu leyti staðsettar utan Íslands."

Slitastjórnin segir að heildarendurheimtur sem Glitnir hafi þegar fengið greiddar vegna rannsókna frá upphafi til dagins í dag nemi 3.150 milljónum króna. „Heildarkostnaður þessa málaflokks þ.m.t. ofangreindur kostnaður svo og annar lögfræðikostnaður, endurskoðendakostnaður og kostnaður vegna rannsóknarfyrirtækisins Kroll nemur nú alls 1.271 milljón króna."