Eignir lánafyrirtækja hækkuðu um 4 milljarða í ágúst

Eignir ýmissa lánafyrirtækja námu 1.128 milljörðum kr. í lok ágúst og hækkuðu um 4,1 milljarð kr. í mánuðinum. Innstæður Seðlabankanum hækkuðu um 5,3 milljarða kr., kröfur á lánastofnanir hækkuðu um 0,5 milljarða kr.

Þettak emur fram í hagtölum Seðlabankans. Þar segir að útlán og eignaleigusamningar námu 963 milljörðum kr í lok mánaðarins og lækkuðu um 5,7 milljarða kr frá fyrra mánuði. Markaðsverðbréf hækkuðu um 2,9 milljarða kr. og aðrar eignir um 1,1 milljarð kr.

Skuldir ýmissa lánafyrirtækja námu 1.098 milljörðum kr í lok ágúst og hækkuðu um 3,3 milljarða kr frá fyrra mánuði. Eigið fé nam 30,5 milljarða kr og hækkaði um 842 milljónir kr. í mánuðinum.

Nýjustu gögn eru bráðabirgðagögn sem kunna að verða uppfærð eftir því sem nákvæmara uppgjör liggur fyrir. Virði útlána og eignaleigusamninga er óljóst í kjölfar dóms Hæstaréttar. Hagtölur ýmissa lánafyrirtækja endurspegla einungis starfandi lánafyrirtæki.

Til ýmissa lánafyrirtækja teljast Íbúðalánasjóður, fjárfestingarbankar, eignarleigur, greiðslukortafyrirtæki og fjárfestingarlánasjóðir.