Reykjaneshöfn tapaði hálfum milljarði í fyrra

Rekstur Reykjaneshafnar skilaði tapi upp á 504,9 milljónir kr. á síðasta ári. Skýrist tapið að mestu af fjármagnskostnaði sem nam 576,8 milljónum kr. Fjárfest var fyrir rúman milljarð á árinu en unnið var að gatnagerð, lóðum, dýpkun og gerð grjótvarnargarðs í Helgvík.

Í tilkynningu um uppgjörið segir Pétur Jóhannsson hafnarstjóri að þrátt fyrir erfiðan rekstur Reykjaneshafnar árið 2009 og skuldir sem nema um 5 milljörðum króna, mun eignastaða Reykjaneshafnar styrkjast fljótt.



Það byggir á því að virði lóðargjalda á óúthlutuðum lóðum í Helguvík, samkvæmt gjaldskrá, er um 4 milljarðar kr. Þá er áætlað að tekjur eftir fimm ár vegna hafnargjalda, lóðarleigu og fasteignaskatta í Helguvík nemi um 500 milljónum kr. á hverju ári.

Áður var talið að aðeins hafnargjöld myndu greiða skuldir upp á 17 árum, en ef framangreint gengur eftir munu skuldirnar verða greiddar upp mun hraðar.