Straumur fékk milljarða en Landsbanki sat eftir

Átján milljarða króna lán sem Straumur fékk frá Landsbankanum sex dögum fyrir hrun og bankastjórar bankans eru látnir bera ábyrgð á var hluti af stærra samkomulagi um sölu á eignum sem Straumur virti ekki. Bankinn sat því uppi með eignirnar en Straumur fékk milljarðana.

Slitastjórn Landsbankans krefur fyrrverandi bankastjóra Landsbankans, Sigurjón Þ. Árnason og Halldór J. Kristjánsson, um 37 milljarða króna í tveimur aðskildum kröfum. Önnur krafan er vegna 19 milljarða króna láns sem Landsbankinn veitti Straumi hinn 2. október 2008 aðeins sex dögum fyrir hrun.

Samkvæmt heimildum fréttastofu var þessi lánveiting til komin vegna stærri viðskipta milli Landsbankans og Straums og hluti af uppgjöri vegna sölu á eignum, nánar tiltekið franska verðbréfafyrirtækinu Kepler Equities og írska verðbréfafyrirtækinu Merrion Capital. Þegar Landsbankinn var kominn af fótum fram, eftir þjóðnýtingu Glitnis, í september 2008 hafi verið leitað eftir því að auka eigið fé Landsbankans án þess að fara í hlutafjáraukningu.

Straumur hætti við kaupin á Kepler og Merrion

Þá hafi verið ráðist í það að selja Straumi Kepler og Merrion. Straumur átti í staðinn að fá lán í krónum að fjárhæð 19 milljarðar. Straumur hafi hins vegar ákveðið að falla frá kaupunum, en látið var hjá líða að tengja lánveitingu Landsbankans til Straums við viðskiptin með ákvæðum í lánasamningi. Straumur hafi þannig ekki efnt sinn hluta samkomulagsins en fengið átján milljarða í laust fé en Landsbankinn setið eftir með fyrirtækin tvö og gat ekki aðhafst þar sem ekki var ákvæði þess efnis í lánasamningi að bankinn gæti fallið frá lánveitingunni ef fallið yrði frá kaupum á fyrirtækjunum tveimur.

Þessi lýsing á málsatvikum var borin undir heimildarmenn hjá þrotabúi Landsbankans, og ekki voru gerðar athugasemdir. Hins vegar lítur slitastjórnin svo á að afgreiðsla lánsins hafi verið bótaskyld vanræksla af hálfu bankastjóranna tveggja.

Slitastjórnin hefur tekið skýrslu af þrjátíu einstaklingum í tengslum á athuganir á viðskiptum bankans fyrir hrun.

Teknar voru skýrslur af bankaráðsmönnum eins og Björgólfi Guðmundssyni, hins vegar var engin skýrsla tekin af Björgólfi Thor. Leitað var eftir viðbrögðum hjá Björgólfi Thor við efni fréttarinnar þar sem hann var stærsti hluthafi beggja bankanna, Straums og Landsbankans, en talsmaður hans, Ragnhildur Sverrisdóttir, sagði að hann vildi ekki tjá sig.