Fyrrverandi sparisjóðsstjóri grunaður um innherjasvik

Grunur leikur á að fyrrverandi sparisjóðsstjóri Byrs og tveir framkvæmdastjórar hafi nýtt sér innherjaupplýsingar í viðskiptum með stofnfjárhluti í sjóðnum. Fráfarandi stjórn Byrs hefur vísað málinu til sérstaks saksóknara.

Einkahlutafélagið H24 var í eigu fyrrverandi yfirmanna hjá Byr Sparisjóði og höfðu því stöðu innherja. Eigendur voru Ragnar Z. Guðjónsson, fyrrverandi sparisjóðsstjóri, Atli Örn Jónsson, fyrrverandi framkvæmdastjóri viðskiptabankasviðs og Sighvatur Sigfússon, fyrrverandi framkvæmdastjóri fjármálasviðs.

Í júlí 2007 lögðu þeir félagar stofnfjárhluti að verðmæti tug milljóna í sparisjóðnum inn í félagið. Hlutirnir voru keyptir í maí sama ár og virðist verðmæti þeirra hafa aukist um rúm 260% á þessum tveimur mánuðum. Á þessum tíma voru sameiningarviðræður í gangi milli Byrs og Sparisjóðs Kópavogs. Eingöngu innherjum í þessum fyrirtækjum var kunnugt um fyrirhugaða sameiningu. Samkvæmt heimildum fréttastofa setti fráfarandi stjórn spurningarmerki við hvort að innherjar, þ.e. Ragnar Z., Atli Örn og Sighvatur, hefðu nýtt sér vitneskju sína með ólögmætum hætti.

Á stjórnarfundi í Byr í upphafi árs 2008 var samþykkt að veðsetja allt stofnfé félagsins gagnvart Glitni. Bent er á að þetta hafi verið gert þrátt fyrir að ákvæði í lánasamningum milli H24 og SPK segi til um að allir hlutir félagsins skuli veðsettir SPK og þá síðar Byr. Með þessum gjörningi hafi bréfin í raun verið tvíveðsett og mögulegt að stjórnin hafi valdið Byr skaða með samþykkt sinni. Í nóvember sama ár undirritaði sparisjóðsstjórinn Ragnar Z. fyrir hönd Byrs skilmálabreytingar á láni til H24, sem var í hans eigu. Breytingarnar fólust í því að vaxtagreiðslu á láninu var frestað um eitt ár. Aðrir eigendur, þeir Atli Örn og Sighvatur undirrituðu samninginn fyrir hönd félagsins.

Samkvæmt heimildum fréttastofu hefur málinu verið vísað til sérstaks saksóknara.

Í samtali við fréttastofu sagði Ragnar Z. að vissulega ættu menn ekki að vasast í eigin málum en skilmálabreytingin hafi farið fyrir stjórn og verið samþykkt af henni. Auk þess sem þáverandi stjórnarformaður hafi kvittað undir hana fyrir hönd stjórnar þegar hún var afgreidd. Þá hafi legið fyrir samkomulag milli Glitnis og Byrs um skiptingu á veðsetningu bréfanna. Hann vísar því alfarið á bug að hafa nýtt sér innherjaupplýsingar og segir regluvörð hafa samþykkt kaupin. Þá sagði hann ljóst að þar sem félagið H24 væri eignalaust færi það í þrot. Skuldir félagsins nemi yfir eitthundrað milljónum króna.