Kynnir rannsókn á klasamyndun í íslenskum jarðvarmageira

Höfundur hinnar svokölluðu klasakenningar mun kynna rannsókn á klasamyndun í íslenskum jarðvarmageira á ráðstefnu í Háskólabíói 1. nóvember næstkomandi.

Ráðgjafafyrirtækið Gekon og Arion banki verða aðalbakhjarl rannsóknarinnar sem verður undir forystu Dr. Michael Porter, prófessors við Harvard viðskiptaháskólann. Porter er einn helsti fræðimaður heims á sviði stefnumótunar og samkeppnishæfni þjóða, að því er fram kemur í tilkynningu.

„Kenningin tekur til myndunar sérhæfðra klasa, svo sem á sviði hátækni, sjávarútvegs, iðnaðar eða jarðvarma, sem gera samfélögum kleift að rækta styrkleika sína með skilvirkum og árangursríkum hætti með það að markmiði að auka varanlega hagsæld og velferð."

Auk Porters mun Dr. Christian Ketels, einnig frá Harvard viðskiptaháskólanum, gera grein fyrir einkennum hins íslenska jarðvarmaklasa og Katrín Júlíusdóttir iðnaðarráðherra mun taka til máls um hlutverk stjórnvalda. Fjöldi annarra sérfræðina, innlendra sem erlendra, mun taka til máls. Forseti Íslands, hr. Ólafur Ragnar Grímsson, er verndari ráðstefnunnar.