Efast um að gengisvarnir hafi verið eðlileg fjármálastjórnun

Hagfræðingur sem starfaði fyrir rannsóknarnefnd Alþingis dregur í efa að gengisvarnir lífeyrissjóðanna fyrir hrun hafi verið eðlileg fjármálastjórnun.

Í skýrslu rannsóknarnefndar Alþingis kemur fram að varnir lífeyrissjóðanna gagnvart sveiflum í gengi krónunnar hafi aukist þegar krónan veiktist, það veki athygli nefndarinnar. Lífeyrissjóðirnir veðjuðu á að krónan myndi styrkjast. Guðrún Johnsen, hagfræðingur, starfaði fyrir rannsóknarnefnd Alþingis. „Það er í rauninni athyglisverðasta atriðið í þessari umfjöllun rannsóknarnefndarinnar hversu mikið af eignum sínum í erlendri mynt lífeyrissjóðirnir vörðu," segir Guðrún.

„Þarna eru lífeyrissjóðirnir með varnir sem eru kostnaðarsamar, festa krónuna þegar hátt gengi er á henni. En þeir eru aftur á móti að verja langtímaeignir sem ekki eru greiddar út fyrr en síðar meir," segir Guðrún og bendir á að þetta hafi einnig verið tekið fyrir af erlendum sérfræðingi sem gaf álit sitt gagnvart rannsóknarnefndinni.