Spáir að verðbólgan fari undir 2% í janúar

Greining Arion banka hefur endurmetið verðbólguspá sína fyrir janúar þar sem Hagstofan hefur „dregið kanínu" upp úr hatti sínum. Nú gerir greiningin ráð fyrir að verðbólgan í janúar verði undir 2%.

Fjallað er um málið í Markaðspunktum greiningarinnar. Þar segir að í fyrri verðbólguspánni var gert ráð fyrir u.þ.b. 0,4% lækkun verðlags í janúar.

„Nú gerum við hinsvegar ráð fyrir í kringum 0,8% verðlækkunar í janúar og mun því tólf mánaða verðbólga fara niður fyrir 2%," segir í Markaðspunktunum. „Verðbólguhorfur eru því afar jákvæðar fyrir næsta vaxtaákvörðunarfund Seðlabankans sem er settur í febrúar.

Þrátt fyrir hressilegar útsölur, -0,9% til lækkunar, þá gerum við á móti ráð fyrir 0,3-0,45% áhrifum uppá við vegna skatta- og gjaldskrárhækkana hins opinbera en enn er hinsvegar nokkur óvissa um áhrif af gjaldskrárhækkunum sveitarfélaganna."

Síðan segir: „Það sem við vissum ekki þá var að Hagstofan mun í janúar taka útvarpsgjald, hét afnotagjald, út úr vísitölu neysluverðs með 0,4% áhrifum til lækkunar verðlags. Þessi lækkun verður því hrein viðbót við útsöluáhrifin og gerum við því ráð fyrir um 0,8% lækkun VNV í janúar, en ekki 0,4% lækkun eins og fyrri spá okkar gerði ráð fyrir."

Ástæðan fyrir þessari breyttu aðferðarfræði er sú að þegar útvarpsgjaldið var tekið upp árið 2009 þá var það kynnt sem breyting á innheimtuformi og voru tekjurnar áfram eyrnamerktar RÚV. Því var afnotagjaldinu haldið inni í VNV. Í útskýringum Hagstofunnar er bent á að á árunum 2009 og 2010 hafi innheimtar tekjur af gjaldinu runnið nær óskert til RÚV. Hinsvegar hefur þessu fyrirkomulagi verið breytt í fjárlögum 2011 - gjaldið hefur verið hækkað en á hinn bóginn var fjárveiting til RÚV skert milli ára. Því lítur Hagstofan nú á útvarpsgjaldið sem beinan skatt.

„Því má segja að gjaldskrárhækkun hins opinbera leiði með beinum hætti til lægri verðbólgu eins einkennilegt og það hljómar. Því er kannski áhugvert að velta fyrir sér hvort Hagstofan geti galdrað upp fleiri kanínur til að vega upp á móti öðrum skatta- og gjaldskrárhækkanir hins opinbera," segir í Markaðspunktunum.