Skuldatryggingaálag Íslands komið undir 300 punkta

Skuldatryggingaálag á evruskuldir Ríkissjóðs Íslands hefur farið stiglækkandi síðustu daga. Þó er ekki um mikla breytingu að ræða, en í lok dags í gær stóð álagið í 299 punktum (2,99%) samkvæmt gögnum úr Bloomberg-gagnaveitunni sem er 11 punktum lægra en það var fyrir viku síðan.

Fjallað er um málið í Morgunkorni greiningar Íslandsbanka. Þar segir að á hinn bóginn er ekki hægt að segja sömu sögu með skuldatryggingaálagið á Írland. Í lok dags í gær stóð það í 393 punktum og í raun hefur álagið á Írland bara einu sinni áður náð hærra gildi, en það var í febrúar árið 2009 þegar það stóð í 396 punktum í lok dags. Þess má geta að á sama tíma, þ.e. í febrúar árið 2009, stóð skuldatryggingaálagið á Ísland í 1.049 punktum.

Meðaláhættuálag á ríki Vestur Evrópu stóð í lok gærdagsins í 176 punktum sem er á svipuðu róli og það hefur verið síðustu daga. Skuldatryggingaálagið á Ísland er fjórða hæsta álagið á meðal þeirra ríkja Vestur Evrópu sem seldar eru skuldatryggingar fyrir. Þau þrjú ríki sem eru með hærra skuldatryggingaálag eru Grikkland (892 punktar), Írland (393 punktar) og svo Portúgal (349 punktar), að því er segir í Morgunkorninu.

Við þetta má bæta að álagið hjá Íslandi fór síðast undir 300 punkta í júlí s.l. og hafði þá ekki verið lægra síðan í maí á síðasta ári.