Stærsta félagið segir skilið við Kauphöllina

Stoðtækja- og gervilimaframleiðandinn Össur hefur farið fram á afskráningu úr Kauphöllinni. Jón Sigurðsson, forstjóri Össurar, býst við að afskráningin gangi í gegn á næstu vikum. Við hana missir Kauphöllin sitt langstærsta félag. Össur hyggst leggja áherslu á skráningu í Nasdaq OMX kauphöllina í Kaupmannahöfn. Félagið er nú skráð í báðar kauphallirnar.

Þórður Friðjónsson, forstjóri Kauphallarinnar (NASDAQ OMX á Íslandi), segir beiðni Össurar vond tíðindi fyrir íslenskan hlutabréfamarkað og efnahagslíf. Beiðnin sýni vel hversu skaðleg áhrif gjaldeyrishöft hafa á efnahagslífið og þeim mun meiri eftir því sem höftin séu lengur til staðar. „Við munum fara vandlega yfir málið hjá okkur samkvæmt okkar verklagsreglum, sem eru fastmótaðar þegar kemur að óskum um afskráningu. Í því ferli er litið sérstaklega til hagsmuna smærri fjárfesta," segir Þórður.

Forstjóri Össurar áréttar að fyrirhuguð breyting nái bara til skráningar hlutabréfanna, starfsemin hér hafi verið að aukast og ekki sé von á breytingum þar á. „Það er alveg ljóst að með krónuna og gjaldeyrishöftin er mjög erfitt að reka alþjóðafyrirtæki á Íslandi," segir Jón, en lætur ósagt hvort aðrar aðstæður hefðu einhverju breytt um beiðni félagsins nú. „En laga- og reglusetning hefur verið óhagfelld fyrir alþjóðafélög á Íslandi, það er ekki nokkur spurning."

Össur hefur verið skráð í íslensku kauphöllina frá árinu 1999 og er eitt stærsta iðnfyrirtæki landsins. Fyrir helgi nam virði félagsins 37 prósentum af heildarvirði félaga Kauphallarinnar.

Afskráningu nú segir Jón vera rökrétt skref fyrir félagið og ákvörðunin sé tekin með þrönga hagsmuni félagsins í huga. „Meirihluti hluthafa er erlendur og 99 prósent af tekjum félagsins eru í útlöndum," segir hann og bendir á að félagið hafi fengið mjög góðar viðtökur á danska markaðnum á því rúma ári sem félagið hefur verið skráð þar. „Við metum það sem svo að viðskiptamagnið sé ekki til skiptanna fyrir þessa tvo markaði."

Jón segir ekkert launungarmál að erlendir hluthafar félagsins hafi verið meira áfram um breytinguna en þeir íslensku. Breytingin fyrir íslenska hlutahafa sé hins vegar engin. „Bréfin verða skráð í dönskum krónum í stað íslenskra. Og Íslendingar sem selja bréf sín hafa þá skilaskyldu gagnvart gjaldeyrislögunum," bætir hann við, en kveður það þó litlu breyta, því fyrir breytingu fái þeir bara krónur fyrir hlut sinn hvort eð er.

olikr@frettabladid.is