Exeter-málið: Segir ólöglegum hlerunum hafa verið beitt

Aðeins einn sakborningur af þremur mætti í Héraðsdóm Reykjavíkur í morgun þar sem frávísunarkrafa í svokölluðu Exeter-máli var tekin fyrir. Það var fyrrverandi forstjóri MP banka sem mætti, Styrmir Þór Bragason.

Málið snýst um 1,1 milljarðs króna lán sem Byr veitti Exeter Holding á seinni hluta ársins 2008. Lánið var notað til þess að kaupa stofnfjárbréf af MP banka og stjórnarmönnum Byrs, Jóni Þorsteini Jónssyni og Birgi Ómari Haraldssyni, á yfirverði.

Jón Þorsteinn, sem er fyrrverandi stjórnarformaður Byrs, og Ragnar Z. Guðjónsson, fyrrverandi forstjóri Byrs, eru ákærðir fyrir umboðssvik.

Styrmir Þór er að auki ákærður fyrir peningaþvætti. Allir hafa þeir neitað sök.

Meðal þess sem fram kom í máli verjanda hinna ákærðu var hörð gagnrýni á víðtækar rannsóknarheimildir embættis sérstaks saksóknara. Meðal annars var sérstaklega sett út á heimild til þess að hlera síma Styrmis. Heimildin var engu að síður samþykkt af Héraðsdómi Reykjavíkur.

Verjandi Styrmis sagði það hlyti að skrifast á reynsluleysi dómarans sem heimilaði hlerunina, en að hans sögn má ekki hlera síma nema viðurlög við meintu broti varði 8 ár. Í tilfelli Styrmis gæti brot hans varðað allt að sex ára fangelsi.

Í rökstuðningi fyrir hleruninni var borið við brýnum almannahagsmunum. Þessu hafnaði verjandi Styrmis og sagði enga brýna almannahagsmuni eiga við í þessu tilfelli.

Verjendur vildu einnig meina að embætti sérstaks saksóknar hefði alls ekki heimild til þess að rétta í málinu. Meðal þess sem þeir lögðu fram var bréf Ákærendafélagsins, sem formaður þess ritaði, sem er Helgi Magnús Gunnarsson, fyrrverandi saksóknari efnahagsbrotadeildarinnar. Hann starfar nú sem saksóknari Alþingis vegna Landsdóms.

Í bréfinu kom fram gagnrýni á embættið en það var stílað á Alþingi. Þar sagði meðal annars að það væri óljóst hvenær mál heyrðu undir sérstakan saksóknara og svo efnahagsbrotadeild. Þá vakti athygli að varaformaður Ákærandafélagsins er sérstakur saksóknari, Ólafur Þór Þór Hauksson.

Einnig var lagt fram bréf ríkissaksóknara, Valtýs Sigurðssonar, til embætti sérstaks saksóknara. Í því kemur fram það sjónarmið að embætti sérstaks saksóknara gæti ekki höfðað mál á hendur aðilum vegna þröngra skorða í lögum um embættið.

Settur saksóknari sagði Valtý hreinlega fara með rangt mál. Sjónarmið hans væri lögvilla.

Verjendur gagnrýndu einnig harðlega framgöngu og aðkomu Evu Joly hjá embættinu. Sögðu þeir hana hafa einnhverskonar alræðisvald sem ríkisstjórn Íslands hefði hlýtt í einu og öllu. Þar af leiðandi væri réttaröryggi í raun ógnað.

Var vitnað til fjölmiðlaviðtala við Evu og viðbragða stjórnvalda vegna athugasemda sem hún hefur sett fram.

Settur saksóknari, Björn Þorvaldsson, sem hafnaði öllum frávísunarkröfunum, sagði um Evu að hún hefði aldrei komið að neinum ákvarðantökum embættisins né hafði hún nokkurntímann tjáð sig um þetta mál.

Því væri það fjarri lagi að ætla að hún hefði með einhverjum hætti haft áhrif á rannsóknina.

Úrskurður verður svo lagður í dóm í dag og má búast við niðurstöðu innan nokkurra vikna.