Dollarinn ekki verið veikari gagnvart krónu í tvö ár

Enn veikist Bandaríkjadollar gagnvart evrunni. Dollarinn kostar nú rétt rúmar 110 kr. og hefur ekki veruið veikari gagnvart krónunni síðan rétt eftir hrunið haustið 2008.

Fjallað er um málið í Morgunkorni greiningar Íslandsbanka. Þar segir að þegar þetta er ritað kostar evran 1,407 dollara sem er hæsta gildi sem evru/dollar krossinn hefur tekið síðan í janúar síðastliðnum. Bandaríkjadollar hefur nú verið í stöðugri veikingu síðan í byrjun september síðastliðins og hefur á þeim tíma veikst um tæp 10% gagnvart evrunni.

Það sem veldur eru hagtölur sem bera það með sér að vöxtur bandaríska hagkerfisins er hægari en reiknað hafði verið með. Ekki hjálpar það dollarnum að á sama tíma og áhyggjur fara vaxandi af stöðu efnahagsmála vestanhafs segja evrópskar hagtölur þau tíðindi að hagkerfi Evrópu séu mörg hver að vaxa nokkuð hratt og bati þar virðist víða vera í sjónmáli.

Veikur dollar hefur gert það að verkum að ódýrara er nú fyrir Íslending að fara til Bandaríkjanna en um langt skeið, en dollarinn kostar nú þegar þetta er ritað 110,07 kr. og hefur ekki verið jafn ódýr síðan rétt eftir hrun.

Gengi krónunnar gagnvart Bandaríkjadollar hefur nú styrkst um 8% frá því í septemberbyrjun og um 15% frá júníbyrjun. Til upprifjunar kostaði dollarinn fyrir hrun 82 krónur en dýrastur var hann fyrir Íslendinga í árslok 2008 þegar reiða þurfti fram 147 kr. til að eignast einn dollara.