Vísa á bug ummælum Evu Joly og segja þau ærumeiðandi

Geysir Green Energy (GGE) vísar á bug ummælum Evu Joly ráðgjafa sérstaks saksónara þess efnis að sala á hlut félagsins í HS Orku gefi tilefni til sérstakrar sakamálarannsóknar.

Í tilkynningu segir að félagið harmar að ráðgjafi saksóknara láti hafa eftir sér svo ærumeiðandi ásakanir sem byggja á staðlausum tilgátum.

„Hafi íslensk yfirvöld áhuga á því að fylgja eftir þessum annars fjarstæðukenndu ásökunum um saknæmt athæfi í tenglsum við viðskiptin, með lögmætri rannsókn saksóknara á þeim þá fagnar Geysir Green Energy því. Með því ætti a.m.k. umræðu um meint ólöglegt athæfi í tengslum við þessi viðskipti að ljúka fyrir fullt og allt.

Slík rannsókn gæti þá bæst í hóp þeirra rannsókna sem viðskiptin hafa þegar sætt og hafa staðfest lögmæti viðskiptanna, hjá nefnd um erlenda fjárfestingu í tvígang og hjá sérstakri nefnd skipaðri af forsætisráðherra," segir í tilkynningunni.

„Geysir Green Energy hefur óskað eftir því við Umboðsmann Alþingis að hann kanni og fari yfir stjórnsýslulega meðferð málsins þar sem lögfræðingar félagsins telja vafasamt að forsætisráðherra hafi stjórnsýslulegt hæfi til þess að skipa rannsóknarnefnd sem framkvæma á óháða og sjálfstæða rannsókn á viðskiptum einkaaðila.

Ekki var um að ræða sölu á auðlindum sem HS Orka hefur afnotarétt af en þær auðlindir eru í eigu sveitarfélaga. Fullyrðingar um annað eru ósannindi eða útúrsnúningur."