Straumur hefur yfirtekið Copenhagen Towers í Örestad

Fjárfestingarsjóðurinn ALMC, áður Straumur, hefur yfirtekið fasteignaverkefnið Copenhagen Towers í Örestad í Kaupmannahöfn. Nafni Straums var breytt í ALMC eftir endurskipulagningu bankans en meðal eigenda sjóðsins auk Straums eru Goldman Sachs, Deutsche Bank og Bayerische Landesbank.

Copenhagen Towers verkefnið var upphaflega á vegum Sjælsö Gruppen, stærsta fasteignafélags Danmerkur, en Björgólfsfeðgar voru meðal fyrrum aðaleigenda þess fyrir hrunið haustið 2008. Um er að ræða byggingu á tveimur háhýsum sem eru meðal hæstu bygginga í Danmörku.

Önnur byggingin hýsir m.a. hótelið Crowne Plaza sem verið hefur í rekstri í tæpt ár. Hin byggingin er skrifstofuhúsnæði. Samanlagt er um nær 60.000 fm að ræða. Dansk Industri er þegar með hluta af skrifstofuhúsnæðinu til leigu en eftir á að klára byggingu á um 28.000 fm.

Í frétt um málið á börsen.dk segir að ALMC sé orðinn meirihlutaeigandi í Copenhagen Towers en 40% eru í eigu annarra fjárfesta. „Við keyptum hálft verkefnið en hagræðið er að helmingur þess er þegar í rekstri," segir Oscar Crohn hinn danski forstjóri ALMC en hann var áður forstjóri Straums í Danmörku.

Crohn segir að eigið fé ALMC nemi nú 700 milljónum evra eða um 108 milljarða kr. Í efnahagsreikningnum eru eignir í norðanverðri Evrópu upp á um 200 milljarða kr.

Crohn áætlar að þegar lokið verði byggingu Copenhagen Towers muni sala þess skila eigendunum um 40 milljörðum kr.