Félag í eigu FL Group sakað um aðild að fjársvikum

Fyrrverandi fjármálastjóri bandaríska fasteignafyrirtæksins Bayrock, er í máli við félagið, meðal annars vegna þess að hann telur að það hafi skotið undan láni sem fyrirtæki tengt FL Group veitti því. Um er að ræða 50 milljón dollara lán sem félagið FLG Property, sem var í eigu FL Group veitti Bayrock árið 2007.

Ástæðan fyrir því að starfsmaðurinn, sem heitir Jody Kriss, er ósáttur, er vegna þess að svo virðist sem hluti af láninu hafi farið persónulega í hendur eiganda Bayrock-félagsins, Tevfik Arif, auk annars stjórnanda.

Tevfik var handtekinn í Tyrklandi grunaður um að tengjast vændisskútu fyrir tveimur vikum síðan. Lögreglan fór um borð í skútuna á þyrlum með sérsveitarmönnum. Fjölmargir kúnnar og vændiskonur fundust um borð í skútunni.

Farið kostaði á milli þrjú þúsund og tíu þúsund dollara. Þá fundust stúlkur undir aldri sem þar stunduðu vændi. Sjálfur segir Arif að um ófrægingaherferð sé að ræða og að hann tengist málinu ekki á nokkurn hátt.

Þá hafa erlendir fjölmiðlar greint frá því að Bayrock átti í miklum viðskiptum við aukýfinginn Donald Trump.

Í Morgunblaðinu í dag er skrifað um málið en þar segir að lögmenn Kriss haldi því fram að stjórnendur FLG Propertys, hafi verið meðvitaðir um að fénu hafi verið ráðstafað með dularfullum hætti.

Lögmenn Judys vilja meðal annars meina að FLG Property hafi setið báðu megin við borðið fyrir utan að fjárfesting félagsins hafi verið skráð sem lán til dótturfélaga Bayrock sem þykir bera vitni um að vitneskju félagsins um að eitthvað óeðlilegt hafi átt sér stað.