Hókípókí-vinnubrögð við útboð á borun á Vaðlaheiði

Ræktunarsamband Flóa og Skeiða (RSFS) borar nú rannsóknarholur á Vaðlaheiði þrátt fyrir að hafa ekki mátt bjóða í verkið vegna þess að það er í greiðslustöðvun. Sambandið fór bakleið að verkinu, sem undirverktaki nátengds fyrirtækis. Vegamálastjóri segir þetta skrítið en þó löglegt.

RSFS bauð lægst í verkið en kom ekki til greina vegna greiðslustöðvunarinnar. Næstlægsta boðið, 40 milljónir, var frá Geotækni ehf., fyrirtæki með þrjá starfsmenn sem skráð er með sama heimilisfang og RSFS. Framkvæmdastjóri Geotækni er verkefnisstjóri í jarðvinnudeild RSFS. Geotækni fékk verkið.

Friðfinnur K. Daníelsson, forstjóri þriðja bjóðandans, Alvarrs ehf., var ósáttur við þetta og sendi Vegagerðinni bréf þar sem hann viðraði þá skoðun sína að Geotækni væri lítið annað en leppur RSFS. Hann spurði jafnframt um reynslu Geotækni af jarðborunum og hvaða mannskap og búnað þeir hygðust nota. Í svari til hans kemur fram að RSFS verði undirverktaki Geotækni í verkinu „og er vísað til þess fyrirtækis um tækjabúnað, tæknilega reynslu, og reynslu starfsmanna þess sem áætlað er að vinna muni verkið“.

„Mér finnst þetta alveg vitaótækt með öllu,“ segir Friðfinnur. „Þetta er hókípókí-aðferð til að koma sér fram hjá hindrunum sem Vegagerðin leggur fyrir menn. Þetta eru bara hundakúnstir sem eiga ekki að líðast í viðskiptum.“ Menn séu í örvæntingu að fara á svig við anda laganna, sem sé bara hægt vegna þess að lögin séu götótt.

Friðfinnur bendir á að ef verkið hefði kostað 50 milljónir eða meira hefði það flokkast sem stórt verk, aðrar reglur hefðu gilt og fyrir­komulagið ekki fengist samþykkt. Friðfinnur hefur síðan fundað með vegamálastjóra og samgönguráðherra vegna málsins.

„Mér fannst líka fyrst að þetta væri eitthvað skrítið en okkar lögfræðingar fóru fram og aftur yfir þetta með tilliti til þess hvernig Geotækni tengist Ræktunarsambandinu og þeirra fjárhagsstöðu og niðurstaðan var sú að það væri ekki hægt að ganga fram hjá Geotækni,“ segir Hreinn Haraldsson vegamálastjóri.

Samkvæmt útboðsgögnum megi verktakar vera með undirverktaka og engin krafa sé um að þeir séu ekki í greiðslustöðvun. Spurður hvort þetta sé ekki gloppa í lögunum segir Hreinn vel geta verið að úr þessu þurfi að bæta. „En við verðum bara að fylgja þeim lögum sem gilda, þó að manni finnist þau stundum svolítið skrítin.“

stigur@frettabladid.is