Aflaverðmætið jókst um 13 milljarða á fyrri helming ársins

Aflaverðmæti íslenskra skipa nam tæpum 68 milljörðum króna á fyrstu sex mánuðum ársins 2010 samanborið við rúma 54 milljarða kr. á sama tímabili 2009. Aflaverðmæti hefur því aukist um rúma 13 milljarða eða 24,7% á milli ára.

Þetta kemur fram á vefsíðu Hagstofunnar. Þar segir að aflaverðmæti botnfisks var í lok júní orðið 50,6 milljarðar kr. og jókst um 25,5% frá sama tíma í fyrra þegar aflaverðmætið nam 40,3 milljörðum kr.

Verðmæti þorskafla var um 24,6 milljarðar kr. og jókst um 28,7% frá fyrra ári. Aflaverðmæti ýsu nam 8,6 milljörðum kr. og jókst um 6,3%, en verðmæti karfaaflans nam um 6,2 milljörðum kr., sem er 21,8% aukning frá árinu 2009. Verðmæti ufsaaflans jókst um 25,1% milli ára og nam rúmum 3,4 milljörðum kr. fyrri hluta ársins 2010.

Verðmæti flatfiskafla nam rúmum 5,4 milljörðum króna í janúar til júní 2010, sem er 5,9% aukning frá fyrra ári. Aflaverðmæti uppsjávarafla jókst um 33,2% milli ára og nam rúmum 10,5 milljörðum kr.

Verðmæti afla sem seldur er í beinni sölu útgerða til vinnslu innanlands nam 28,3 milljörðum króna og jókst um 32,5% frá árinu 2009. Aflaverðmæti sjófrystingar voru rúmir 22 milljarðar kr., sem er 33,2% aukning milli ára. Verðmæti afla sem keyptur er á markaði til vinnslu innanlands jókst um 43,4% milli ára og var um 11 milljarðar kr.