Flöt niðurfærsla er dýrasta leiðin

Flöt niðurfærsla skulda er mjög dýr aðgerð og skilar í raun svipuðum eða minni árangri og aðgerðir á borð við hækkun vaxtabóta eða sértæka skuldaaðlögun. Þetta er mat sérfræðingahóps sem hafði það að markmiði að meta kostnað af ýmsum þeim leiðum sem í umræðu hafa verið til lausnar á skuldavanda heimilanna.

Samkvæmt niðurstöðum nefndarinnar myndi flöt niðurfærsla skulda um 15,5% kosta 185 milljarða króna, niðurfærsla skulda miðað við upphaflega lánsfjárhæ myndi kosta 155 milljarða króna og niðurfærsla skulda að 110% af verðmæti fasteigna myndi kosta 89 milljarða á ári. Lækkun vaxta myndi kosta 24 milljarða á ári og hækkun vaxtabóta myndi kosta 2 milljarða á ári.

Sérfræðingahópurinn telur að engin ein leið megni að koma öllum til bjargar. Það sé líka ljóst að ekki verður öllum bjargað, en þá reyni á að fjármálastofnanir, ríki og sveitarfélög nái saman um að húsnæðisúrræði, meðal annars með því að setja á fót öflugt kaupleigukerfi.

Sérfræðingahópurinn bendir alls á níu leiðir sem hægt væri að fara við leiðréttingu á skuldastöðu heimilanna. Þær eru eftirtaldar:



1. Flata niðurfærslu skulda um 15,5%.

2. Niðurfærslu skulda m.v. upphaflega lánsfjárhæð

3. Niðurfærslu skulda að 110% af verðmæti fasteigna

4. Niðurfærsla skulda að 110% af fasteignastöðu stiglækkandi

5. Hækkun vaxtabóta

6. Lækkun vaxta á fasteignalánum í 3%

7. Tveggja þrepa nálgun (sölu-/kaupréttur)

8. LÍN leiðin

9. Eignarnám og niðurfærsla skulda með gerðardómi.