Netspilavíti spáir í íslenskt gagnaver

Eigandi netspilavítisins BoDog segist ætla að flytja netstarfsemi sína til íslenska gagnaversins Thor Data Center. Þetta kemur fram í umfjöllun á vefsíðunni onlinecasino.com. Samkvæmt upplýsingum frá gagnaverinu hafa þó engir samningar verið gerðir og er málið allt á könnunarstigi.

Talsmaður Thor Data Center segir í samtali við Vísi að umrætt netspilavíti sé aðeins einn af fjölmörgum aðilum sem hafi sýnt gagnaverinu áhuga. Málið sé þó engan veginn komið eins langt og skilja megi á fréttinni á onlinecasino.com. Eigandi spilavítisins hafi vissulega haft samband og kynnt sér það sem Thor Data Center hafi upp á að bjóða en að engir samningar hafi þó verið undirritaðir.

Eigandi BoDog, Calvin Ayre, virðist því hafa farið eilítið fram úr sér. Hann bendir á í samtali við vefsíðuna að hann hafi valið Thor Data Center á Íslandi því það sé í hópi umhverfisvænustu gagnavera heimsins.

Fram kemur að Ayre telji það mikilvægt að þeir sem reka spilavíti á netinu taki frumkvæði í því að draga úr losun kolefna í andrúmsloftið. Það geti þeir gert með því að versla við gagnaver sem eru umhverfisvæn eins og Thor Data Center.

Það fylgir sögunni að rekstur netspilavíta á borð við BoDog sé einhver gróðavænlegasta starfsemi sem fram fer á netinu.

Thor Data Center var tekið í notkun í sumar og er það gagnaver í heiminum sem veldur minnstri röskun á umhverfinu samkvæmt tilkynningu sem gefin var út. Bæði er það vegna nýrrar gámatækni sem gagnaverið notar, en ekki síst vegna þess að það nýtir einungis endurnýjanlega orku frá íslenskum gufuaflsvirkjunum.

Gagnaverið hefur tryggt sér 3,2 megawatta raforku frá HS Orku á Suðurnesjum og ákvæði eru í samningnum um allt að 19,2 megawött ef þörf krefur. Thor er fyrsta gagnaverið af þessum toga sem tekið hefur verið í notkun á Íslandi.